- Dettagli
- Scritto da Maria Antonietta Bruno
- Categoria: Fatti e Filastrocche
- Pubblicato: 02 Febbraio 2026
- Visite: 219
La festa di San Biagio e le ggiostre
Alli primi te febbraiu rrivava la festa te San Biagiu, la prima dopu la Befana. All'epuca mia, San Biagiu, nu se festeggiava sulu alla chiesia, cu la messa solenne,la prucissione e la bbenetizzione te la gola, ma , cosa mutu 'mportante pe nui vagnuni, rrivavane le bbarracche te ggiocattuli, te dolci e cosa cchiu bbella te tutte, rrivavane le ggiostre. E a ddhru 3 te febbraiu te lu 1970, a rretu alla chiazza cuperta, se piazzara : le machine- scontru, li seggiolini e l'apparecchi. Ehhh, le ggiostre erane l'unicu divertimentu pe nui piccinni, e de le feste nu spettavame addhru ca cu ne facìmu quanti cchiu ggiri era possibile...ma, nc'era nu "ma"crande quantu lu sole...e li sordi addhru stìane? 50 lire lu ggiru nu nn'era nu scherzu, è veru ca li zzicavame a 'ncucchiare nu picca te tiempu prima, ma sempre picca erane . E cusì, rrivau la festa. Me e la Delia,amica mia te sempre, scimme prima alla bbenetizzione te la gola e poi pensamme cu passamu te le ggiostre. Ma, prima te tuttu stu giru, scimme cu truvamu lu nonnu Ninu te la Delia, ca cuntentu pe la visita,ne regalau li sordi pe le ggiostre. Me puru, qualche giurnu prima, hìa 'ncucchiatu li sordi ca m'hìa datu la nonna Memena e quiddhri te lu nonnu Nzinu. 'Nzomma tra li mia e li sua hìame sciutu bbone, e decisime ca n'hìame fare tutti ggiri alle ggiostre. Lu tiempu era limpitu, ma soffiava nu jentu te tramuntana congelatu, ca rrivava tarittu te la Russia.
Alli primi te febbraiu rrivava la festa te San Biagiu, la prima dopu la Befana. All'epuca mia, San Biagiu, nu se festeggiava sulu alla chiesia, cu la messa solenne,la prucissione e la bbenetizzione te la gola, ma , cosa mutu 'mportante pe nui vagnuni, rrivavane le bbarracche te ggiocattuli, te dolci e cosa cchiu bbella te tutte, rrivavane le ggiostre. E a ddhru 3 te febbraiu te lu 1970, a rretu alla chiazza cuperta, se piazzara : le machine- scontru, li seggiolini e l'apparecchi. Ehhh, le ggiostre erane l'unicu divertimentu pe nui piccinni, e de le feste nu spettavame addhru ca cu ne facìmu quanti cchiu ggiri era possibile...ma, nc'era nu "ma"crande quantu lu sole...e li sordi addhru stìane? 50 lire lu ggiru nu nn'era nu scherzu, è veru ca li zzicavame a 'ncucchiare nu picca te tiempu prima, ma sempre picca erane . E cusì, rrivau la festa. Me e la Delia,amica mia te sempre, scimme prima alla bbenetizzione te la gola e poi pensamme cu passamu te le ggiostre. Ma, prima te tuttu stu giru, scimme cu truvamu lu nonnu Ninu te la Delia, ca cuntentu pe la visita,ne regalau li sordi pe le ggiostre. Me puru, qualche giurnu prima, hìa 'ncucchiatu li sordi ca m'hìa datu la nonna Memena e quiddhri te lu nonnu Nzinu. 'Nzomma tra li mia e li sua hìame sciutu bbone, e decisime ca n'hìame fare tutti ggiri alle ggiostre. Lu tiempu era limpitu, ma soffiava nu jentu te tramuntana congelatu, ca rrivava tarittu te la Russia.
-
Dopu la chiesia, cu nnu ssìa,mo ci sciati alle ggiostre,saliti sull'apparecchi ? Ca cu stu jentu friddu bbuscati te sicuru. Facitive sulu qualche ggiru sulle machine scontru...nu bbe spenditi tutti li sordi e turnati fucendu a casa -
Quiste erane le raccomandazzioni te la nonna mia e de la cummare Ttina, mamma te la Delia.
-
None, nu salimu sull'apparecchi, ne facimu sulu qualche ggiru sull'addhre ggiostre e basta, poi vitimu la festa e turnamu-
-
Sciati e stati 'ttente!-
Dopu ca l'arciprete ne benedisse la gola, ne sentiame cchiu sicure,putìame sfidare lu jentu friddu te tramuntana, tantu nu n'è mmalazzavame. Rrivamme tirate all'apparecchi e ne ccattamme 5 ggettoni. Se usava ca cinca rimanìa cchiu ertu alla fine te lu ggiru, vinciamo n'addhru ggettone...e me e la Delia, vinzime tanti ggiri e spisime tutti li sordi ca tenìame, tantu èrame sicure ca nu n'è mmalazzavame. Cappotto,cappieddhru e scialla te lana, guanti ...e bbenetizzione te la gola, ne proteggìane te ogni cosa. 'Nchianavame e scindìame su ddhr'apparecchi e lu jentu ca ne sbattia a'nfacce era ghiacciatu...ma erame felici e cuntente, lu presciu superava tuttu. Quandu scisime te ddhra susu, hìame 'ntustatu comu to pale te baccalà. Turnamme a casa ca già nc'era qualche cosa ca nu scia bbona. Nu nn'era possibile ca a tutte toi ne facìa male la gola! Quandu rrivau la sera, meve tenìa già la freve erta, e allu crai mmatina me truvai tutta gonfia te sotta alle ricche...nu ssulu hìa bbuscatu alli cannaozzi, ma m'hìane venutu puru li ricchiaciani ( gli orecchioni).
-Nonna, percè la Delia nu sta vene cu me trova?
-
ne dumandai
-Nah percè? E me lu dumandi puru? Ca stae alle stesse condizzioni tua ! Hìti vistu cce hìti ccappatu cu nu sentiti li cunsiji nosci?Speriamo ca 'mparati pe n 'addhra fiata!
Ne ficime 15 giurni curcate.
Quante parole ne bbuscamme, ma ormai era fatta! Intantu già pensavame alla vicina festa de l'Annunziata!
.