Carniale e li masci

- Nonna, carnevale mo passa e nui nu simu ssute mancu na fiata .

- Uhh ,hai voglia cu essi ,'ncora c'è tiempu... fanne cu trasa armenu.

- Comu fanne cu trasa ? Te stessa hai tittu ca lu 17 gennaio ete la prima mascherata a Napuli e mo stamu già a febbraiu. Ete Carnevale chinu !Lu nonnu ha tittu ca a mute case se bballa la sera .

- Sine ,citta...cra ssera putiti ssire.

- Allora, nonna ,trovame le rrobbe cu me vestu.

-Nah le rrobbe, ca cce bboi cu te menti? Nc 'ete lu sciallinu mia vecchiu, ca mia fattu soruma la Ppina e la mantile ca s' ave strazzata e lu maccatururu a fiuri ,cu te scunda li capiddhi.

- E me ,cu ddhe rrobbe vecchie aggiu scire ?

-E cce bbulivi lu vestito te sera o lu dominu comu li crandi ? Cusì comu aggiu tittu ,vai bbona . Lu nonnu te ccatta na bella maschera te fatina.

- Nah ,la maschera te fatina ... ete meju una te bbefana pe comu maggiu bbestire ! Ma nu me pozzu mentire lu vestitu te Pierrot?

-Comu lu vestitu te Pierrot? ... ca te carta crespa ete ,comu essi te lu strazzi.

- Ca me su se strazza oju, ca nu me piace ! Cu ddha facce sempre a chiantu... Te carnevale se rite nu se chiange . Nonna ,sta te lu dicu,jo ddhu vestitu, tumenaca nu me lu mentu !

- E allora rimani a casa .Nonnuta nu fazzu cu te porta allu veglioncinu e mancu alla scola vai vestuta te masciu. Te rranci!

- Sine,sine ,va bbene !

Sienti, mo basta, nu ffare cu me stizzu ... li masci Cusì se vestane .Nu ll'hane canuscire e bbasta... pe ddhu picca ca viti divertire basta e avanza. E me raccumandu, nu rispunditi fiaccu alli cristiani ca fermati e ... nu tardati mutu, menz'ora ,tre quarti d'ora ,su cchiui ca sufficienti.

-Tantu picca ? ... armenu n'ora

- Ci tardi cchiui te quiddhu ca taggiu tittu,nu essi qualche addha sera.

-Va bene, nu te preoccupare!

L'ansia e la felicità ca iame ssire era tanta pe tuttu lu gruppu. Puntuali,all'ora stabilita, ne partiame te nanzi a casa, qualche curiandulu e qualche 'nzicareddha, le trumbette e via !

Tutti li campanieddhi ca ne truvavame te nanzi l'iame sunare . Ne fermavane e critavane : sta passane li masci. Erame tutti cuntenti ,sia cce faciame . Carnevale, lu periudu cchiu bellu te l'annu era rrivatu !

Alla mia amatissima nonna Tetta !