- Dettagli
- Scritto da Maria Antonietta Bruno
- Categoria: Fatti e Filastrocche
- Pubblicato: 30 Aprile 2023
- Visite: 360
Dolci , cce passione !
" Nonna,oju fazzu nu dolce "
" Nah , fija mia ... e cce dolce hoi cu faci ? ...me, sulu la crostata cu la marmellata e le paste pe lu latte sacciu cu fazzu ... ah , e le carteddhate,quiddhe si ca le fazzu propiu bbone ! ".
" Ma me, nonna, oju cu fazzu nu dolce diversu ,no cu la marmellata . "
" Allora spetta ca mo sciamu a ddha la cummare Tetta,ca quiddha sape cu fazza tuttu ... ete mutu bbrava !"
" Cummare Tetta,la vagnone ole cu fazza nu dolce cu se 'mpara e nu ne tici te cce pote fare ? "
" Nah cummare mia , ca tici ? cu tuttu lu core ! "
" Bbrava Maria Antonietta ! ... Sienti hoi cu faci la ciambella ,ca ui teniti nu bellu stanatu te la Svizzera ,cu lu buciu a mmienzo ? Oppuru hoi cu faci le meringhe , nu dolce speciale ca se face cu li bianchi te l'ove ? Viti ,però ,ca suntu nu picca cchiu difficili ".
" Oju cu fazzu le meringhe ! .
" Bbrava,bbeddha mia ... Allora,sbatti tre bianchi d'oe intru a na coppa ( te ceramica ) cu ddo forchette 'ncruciate , quandu su bbelle spumose e denze , chianu chianu,ggiungi lu zuccheru e sbatti , sbatti , sbatti finchè nu te cate lu razzu . Ci giri la coppa sottasusu lu biancu nu n 'ave catire . Poi ,spriculi le mendule dopo ca l'hai bbrustulite , sparti la crema e a na parte ggiungi le mendule e l'addha la llassi cusì ... me raccumandu , bbella bbella quandu faci sta cosa , cu nu rruvini la montata . Poi cu ddo cucchiarini faci li muntunieddhi su na scatula perta te scarpe,te quiddhe bianche e lucide , cusì nu sse ttacca ,e cu la parte senza le mendule,sempre cu lu cucchiarinu ne faci nu bbellu ciuffettu a susu . Lu furnu ha ddessere leggeru leggeru,ca nu ssane bbruciare , ma ssucare . Tieni pertu nu picca lu sportellu cu se n 'dessa l'umidità e dopu tre ore , ci nu puru te cchiu, quandu sane cotte,stuti lu furnu e le llassi a ddhrintru. Maggiu spiecata bbona ? "
" Si ,nunna Tetta . Grazzie ! "
Le meringhe furono un successo ed io ,da allora, ho continuato a fare dolci . La passione e la voglia di sperimentare non mi sono mai mancate .
P.S. Ah,dimenticavo ... avevo solo 11 anni !
