"Li Cunti te la sera "

Li to cumpari

Nc'era na fiata,a nu paese vicinu, to amici, ma amici amici, ca se spartiane puru lu sonnu. Faciane sempre tuttu te paru, addhu scia unu scia l'addhu. Faticavane te paru, ssiane te paru, e faciane l'amore cu ddo caruse ca erane puru soru. Na sera, turnati te casa alle zzite,siccomu era festa crossa a nu paese te ddha nnanzi, penzara cu basciane cu bbitane la festa e cu salutane lu santu. Pijara le biciclette ca siane ccattatu cu tanti sacrifici e partira alla festa. Rrivati allu paese , scira prima te ogni cosa cu salutane lu santu , ca era nu santu ' mportante , te prima catecoria,ca facia tanti miraculi, poi ggirara nu picca alla festa, se 'ntisera nu pezzu te banda, na banda bbona, ccattara to scagnozzi, nu stozzu te cupeta e ddo nuceddhe cu le portate a casa...siccomu, però, nia venuta nu picca te fame a tutti toi, penzara cu bbasciane a na puteca cu se mangiane nu pezzettu e cu sse ssuppane nu picca . Trasuti alla puteca pijara postu a nu taulinu. L'oste se 'nvicinau e ddumandau cce buliane cu ne porta. Lu Totu quardau lu Pippi e disse : cce dici ne pijamu to pezzetti ,le purpette e nu litru te vinu?

- Sine - tisse lu Pippi- vae bbonu

L'ommu ca servia, turnau fucendu cu quiddhu ca iane ordinatu e puggiau tutto sullu taulu.

- Però- tisse - purpette have sulu 2 , una crossa e una piccicca...vol dire ca bbe le spartiti .

Li toi amici zziccara a mangiare. Spicciara la carne e se ssuppara lu pane intra la sciotta. Poi, lu Totu, senza cu ddica nienti, ' mpizzau la furcina e se pijau la purpetta cchiu crossa.

Lu Pippi sia ca rimase nu picca fiaccu te stu gestu e disse : Totu, nu tieni etucazione!

- Perce` ?- tisse lu Totu

- Ca tai pijatu la purpetta cchiu crossa

- Perce` se ivi calatu prima teve quale tivi pijatu ?

- Se ia calatu prima meve , pe ducazzione, mia pijatu la cchiu piccicca

- E 'mbeh ? Nu ete lo stessu? Jo, quiddha taggiu lassatu !

 

Al mio caro zio Toto !