- Dettagli
- Scritto da Maria Antonietta Bruno
- Categoria: Fatti e Filastrocche
- Pubblicato: 21 Febbraio 2023
- Visite: 346
La Curemma te Arataion
Quandu me era piccicca e rrivava stu periodu, nu se putia caminare pe le vie te lu paese. Scivi te qquai e la truvavi 'mpisa a nu filu te fierru filatu ca scia te na parte all'addhra te la via, ggiravi te ddhrai e la vitivi ssettata susua nu balcone ...ahi,ccè pena e ccè paura! Ah ,scusati, ma nu bbaggiutittu ci era ca me tormentava : era la Curemma ! Si, propiu iddhra,ca a ddhri tiempi nu era certu beddhra comu quiddhra ca face Arataion,ca sulu cu la viti quandu lu Salvatore la minte intru allu bbidone cu la brucia,te se squaia lu core ! E de giurnu,quandu passi cu bbai alla chiazza o te fermi alla Maria Luce pe lu pane,la quardi e sia ca te dispiace cu la viti 'mpisa a ddhra susu alla Torre te l'Orologiu, esposta a tutti li tiauli. Ete tantu bella ddhra vecchiareddhra,linda, linda, vestuta si te neru, ma ca nu te face nuddhra impressione,anzi te affezzioni puru ! Invece,prima ,tantu ca era bbrutta, a me,e pensu a tutti li pari mia,ne facia paura . Quandu la nonna mia me ticia cu bbau alla puteca te lu Giorgi cu ccattu qualche cosa ,me nu 'mbulìa mai cu bbau . - Vane cu la Maria Delia - me ticia la nonna. - Percè nonna ,secondu te, la Delia nu la time ? Viti ca ete propiu brutta , pare na morta ca è scappata te intru allu baulu . E poi, fanne ca se spezza lu filu addhrunca stae 'mpisa e ne cate a 'ncapu mentre sta passamu ? ... ma percè la ppendane? nu capiscu percè ! -
- Fija mia,la Curemma stae 'mpisa pe 40 giurni cu ne ricurdamu ca quistu ete periudu te penitenzae sacrificiu prima te Pasca ... ma ste cose nu te le ticiane allu Catechismu ? -
- Nonna ,allu catechismu ne cuntane te la Quaresima e no de la Curemma ! -
L'anni su passati e curemme 'mpise all'anguli te le vie se vitane picca ... passamme te n'eccessu all'addhru . Li piccinni nu tenane cchiui tanta paura te sti fantocci percè faciane meno impressione te quiddhri te na fiata e poi, moi lu significatu ne lu spiegane puru. Qualche annu 'rretu,ogni tantu,ccumpagnava all'asilu la fija te n'amica mia e la vagnone me ticia : Passiamo prima a salutare la Curemma ?.
Eh si,li tiempi su cangiati e le tradizioni hane continuare ,ma senza cu mentane paura !