San Nicola cu la sarda a 'mbucca

Matonna mia cce caddu ca sta face...e quandu chiove nu picca ca addhra mmienzu sta sicca tuttu ? Se preciane tutti ca la staggione cadda è rrivata ' nticipata. Si si, ste sciurnate l'imu ' ncora chiangire. Certu ete bellu cu te sbracci, cu bbai a mmare e cu te faci lu bagnu...ma imu pensare ca le cose vane cu le cose e ca quista ete la primavera e no l'estate. Se continua te stu passu, me sape tantu ca st ' annu , alla prucissione, Santu Nicola l'hane cacciare ' ntorna cu "la sarda a 'mbucca" ,comu successe tanti e tanti anni a rretu, quandu la popolazione se ' ntestardiu cu ne mente la sarda sulli musi te lu santu ... cu mora te la sete puru iddhru e cusì se sbricava cu fazza lu miraculu . Certu ca l'arciprete te tandu nu ' mbulia cu fazza stu gestu ca sapia propiu te "paganesimu, ma la deputazzione"te la festa se ' ntestardiu, nu ' nc'era nienti te fare : Santu Nicola ia pruare puru iddhru la sete e allora ne putia venire n 'soccorsu allu populu te Taraddeu, facendu lu miraculu cu chiova. Cu ll'acqua tuttu turnava a vita...lu cranu ,le vigne,l'ortu, l'arbuli . Se ' nchiane li puzzi,le cisterne e li cristiani , ca nu bastava ca già teniane picca cu mangiane, oltre cu sparagnavane l'acqua cu se llavane, iane sparagnare puru su lu bbivire. Allora l'arciprete se arrese e disse : faciti cce bbuliti !

Foe cusì ca Santu Nicola, la sera te la prucissione, ssiu cu la sarda a 'mbucca e fice lu miraculu.

Santu Nicola mia, se nu te disturbamu troppu, iutane puru moi comu facisti tandu ( senza bisognu te la sarda) ca nu picca te acqua 'nciole se nu 'mbulimu lu mundu cu bascia capi sotta !